خلّصنه بعد ماظل شي ننطيك..
يملك الموت ظلت بس قصيدة
بيهه المطلع يسولف على الموت..
وأجه سهم المفخخ حز وريدة
تعذرنه تره ماباقي بالبيت ..
آخر طفل لفوه بجريدة
شسولفلك علينه بعينك تشوف ..
دمعه تموت وتخضر جديدة
نفس مآساتنه ونفس المعاناة ..
والخلّص أمس باچر نعيدة
إ حنه من المهد مازارنه العيد ..
وگالوا عیدکم مقفوله أيده
چذبنه ونطرنه بطرگ العیون ..
وأجه العيد بعلم ملفوف عيده
وعله العبوة گعدنه وچنه صيّام ..
وافطرنه عله بارود الحديدة
نخابر عالنصر بس مايدگ ليش!! ..
أثاري الدم فشل خلّص رصيدة
يعمي ولانريد الشعب قانع..
بس سدولنه حلوگ المدافع
وشوفوا بيوت اهلنه بغير بيبان ..
وملك الموت بيهن طاب طالع
الدول تحفر ذهب وتصفي بترول ..
واحنه شحچه الساتر والمواضع
الدين اصل الامان وجنة الروح ..
واحنه نخاف گمنه من الجوامع
عله متون الشوارع ذبحوا الياس ..
وزرعنه ارواح خضره عله الشوارع
عله شاشات العرض شرونه الانذال ..
وعالانترنيت خلونه مقاطع
مقطع طفله تبچي ولازمه الباب ..
تطر گلب السمه من تصيح طالع
بابا وگال ارجع مارجع ليش ..
ولهسه باذني يصرخ بابا راجع
چايمته تجي خافن يجي العيد ..
واظل عله الفرح بعيوني اباوع
ومقطع للمفخخ مقطع اعدام ..
مقطع ذبح من سيّاف بارع
ماظل شي بعد ماشافته العين ..
وصدگ ضاگت تره بس الله واسع
باچر تنتهي وتدور الايام ..
وماينفع بعد عض الاصابع
عله السنهم نخليهم يعضون ..
ونعلگ الروس بتيول الشوارع
السبت سبتمبر 13, 2008 1:41 am
